Техникалық шығармашылық мектебінде әрбір бала өз қабілетін ашуға, шығармашылықпен ойлауға үйренуге және инженерия әлеміне алғашқы қадам жасауға мүмкіндік алады. Техникалық құрастырумен айналысу балалардың кеңістіктік ойлауын, конструкторлық дағдыларын, дербестігін және стандартты емес шешімдер табу қабілетін дамытуға көмектеседі. Модельдерді өз қолдарымен жасай отырып, балалар тек практикалық дағдыларды меңгеріп қана қоймай, болашақ мамандығын таңдауға да алғашқы қадамдарын жасайды.
Өз ісіне берілген осындай педагогтердің бірі — Иван Иванович Косарев, техникалық құрастыру клубының жетекшісі, кеме модельдеу спорты бойынша халықаралық дәрежедегі спорт шебері және Қазақстан Республикасының жоғары санатты ұлттық төрешісі.
Иван Ивановичтің кеме модельдеу спортына деген қызығушылығы мектеп қабырғасында жүрген кезінен басталған. Сүйікті хоббиі уақыт өте келе өмірлік ісіне айналды. 2012 жылы ол кеме модельдеу спорты бойынша спорт шеберлігіне кандидат нормативін орындаса, екі жылдан кейін халықаралық дәрежедегі спорт шебері атағын алды. Жинақтаған тәжірибесі мен техникалық шығармашылыққа деген сүйіспеншілігін ол балаларға үйретуді жөн көрді.
Бүгінде Иван Иванович 8 бен 16 жас аралығындағы тәрбиеленушілермен жұмыс істейді. Сабақ барысында балалар сызбаларды оқуды үйренеді, ағаш және слесарьлық құралдармен жұмыс істеу тәсілдерін меңгереді, әртүрлі материалдарды өңдеу технологияларымен танысады, өз модельдерін жасап, инженерлік идеяларын жүзеге асырады. Педагог әрбір балаға өз қабілетін ашуға, техникалық ойлауын дамытуға және өз күшіне сенуге көмектеседі.
Иван Иванович сабақтардың тек қызықты ғана емес, болашақ мамандықты таңдауға пайдалы болуына ерекше көңіл бөледі. Техникалық құрастыру арқылы тәрбиеленушілер кеме жасау, автомобиль жасау және авиация салаларының негіздерімен танысып, инженерлік мамандықтар әлемін ашады.
Педагогтің жоғары кәсіби шеберлігін оның тәрбиеленушілерінің жетістіктері дәлелдейді. Олардың арасында қалалық, облыстық және республикалық жарыстардың жеңімпаздары мен жүлдегерлері бар. Иван Ивановичтің өзі де кеме модельдеу спорты бойынша жарыстарға белсенді қатысып, түрлі турнирлерде бірнеше рет жеңімпаз және жүлдегер атанды.
Қазақстан Республикасының жоғары санатты ұлттық төрешісі ретінде ол түрлі деңгейдегі жарыстарға төрешілік етеді. Оның көп жылғы еңбегі Қарағанды облысының Спорт департаменті және Республикалық қосымша білім берудің оқу-әдістемелік орталығының дипломдарымен, грамоталарымен және алғыс хаттарымен атап өтілген.
Иван Иванович жетістікке жетудің бастауы — қызығушылықта екеніне сенімді. Сондықтан ол үшін ең үлкен марапат — тәрбиеленушілерінің жетістіктері, олардың техникалық шығармашылыққа деген қызығушылығы және жаңа нәрсе жасауға деген ұмтылысы.
Алда — жаңа жобалар, жарыстар мен жеңістер. Демек, тәжірибелі тәлімгердің жетекшілігімен жас конструкторлардың әлі талай буыны инженерия әлеміне алғашқы қадамдарын жасайтын болады.