Табиғатты тек бақылау арқылы ғана емес, оны өз қолыңмен зерттеу арқылы да тануға болады. Дәл осы қағида «Балалар технопаркі» Балалар мен жасөспірімдердің техникалық шығармашылық мектебінің «Жасыл мектебі» үйірмесіндегі сабақтардың негізіне алынған. Қосымша білім беру педагогі Колова Наталия Вячеславовна балаларға ботаника, тәжірибелік зерттеу жұмыстары мен заманауи технологиялар біртұтас практикалық үдеріске айналатын жағдай жасайды.
Наталия Вячеславовнаның сабақтары бала дайын білімді жай ғана қабылдамай, оны өз бетінше көріп, тексеріп, қорытынды жасайтындай етіп ұйымдастырылған. Неліктен бір өсімдік екіншісіне қарағанда тезірек өседі? Тұқымның өнуі үшін не қажет? Ылғал мөлшері, температура немесе жарықтандыру өсімдікке қалай әсер етеді? Балалар бұл сұрақтардың жауабын өз бақылаулары мен тәжірибелері барысында табады.
Тәрбиеленушілер үшін өсімдіктерді өсіру ерекше қызығушылық тудырады. «Жасыл мектепте» үйреншікті бөлме гүлдерімен қатар нағыз экзотикалық өсімдіктер де өседі: авокадо, манго, маракуйя, құрма пальмасы және батат. Балалар базилик, розмарин, лаванда, бөлме қызанақтары мен бұрыштарын өсіріп, өсімдіктердің алғашқы өскіндерінен бастап толыққанды дамуына дейінгі үдерісті бақылайды.
Практикалық жұмыс біртіндеп кеңейе түседі. Тәрбиеленушілер өсімдіктерді көбейтуді, топырақты дұрыс дайындауды, өсімдіктерді басқа ыдысқа ауыстырып отырғызуды, көшеттерге күтім жасауды және кепкен гүлдерден композициялар жасауды үйренеді. Табиғи материалдардан панно, гүлшоқтары, шыршалар, гүлді шамдар, бетбелгілер және ерекше сәндік бұйымдар жасайды. Осылайша табиғат туралы білім практикалық әрекетпен және қоршаған әлемді эстетикалық қабылдаумен ұштасады.
Наталия Вячеславовнаның жұмысындағы заманауи бағыттардың бірі — гидропоника. Бұл жерде «Жасыл мектеп» жаратылыстану мен техникалық шығармашылықтың өзара байланысын айқын көрсетеді. Балалар өсімдіктердің топырақсыз да өсе алатынын бақылайды, су деңгейін, жарықтандыру мен температураны қадағалайды, pH көрсеткішімен және қоректік ерітінділермен танысады.
Мұндай жұмыстың тағы бір маңызды қыры — балаларды дербестік пен жауапкершілікке тәрбиелеу. Әр баланың өз міндеті бар: өсімдіктерді бақылау, қондырғы параметрлерін қадағалау, өзгерістерді белгілеу және көшеттерге уақытылы күтім жасау. Біртіндеп балалар нәтижеге олардың ұқыптылығы мен күнделікті еңбегі тікелей әсер ететінін түсіне бастайды.
«Жасыл мектеп» тәрбиеленушілерге экологияны алыстағы әрі күрделі мәселе ретінде емес, күнделікті өмірдің бір бөлігі ретінде қабылдауға көмектеседі. Өсімдікке күтім жасау, суды үнемді пайдалану, материалдарды қайта қолдану, өз өнімдерін өсіру — мұның барлығы қоршаған ортаға жауапкершілікпен қарау мәдениетін қалыптастырады.
Наталия Вячесловнаның сабақтарының ерекшелігі — мұнда білім баланың өз тәжірибесі арқылы қалыптасады. Тәрбиеленуші тұқым отырғыза алады, оның өсуін бақылайды, сәтсіздікке тап болуы мүмкін, басқа тәсілді қолданып көріп, нәтижеге қол жеткізеді. Қызығушылықтан зерттеуге дейінгі дәл осындай жол дербес ойлауды және ғылымға деген қызығушылықты қалыптастыруға көмектеседі.
«Жасыл мектеп» — табиғат нағыз зертханаға айналатын, ал әрбір өскін үлкен жаңалықтың бастамасы бола алатын кеңістік. Мұнда балалар өсімдіктерді өсіруді ғана емес, бақылауды, сұрақ қоюды, тәжірибе жасауды, қорытынды шығаруды және адам, технология мен қоршаған ортаның қаншалықты тығыз байланысты екенін түсінуді үйренеді.